Mobiuz bir qator OAV va ta’lim saytlariga bepul kirish imkonini yaratdi

Chop etish versiyasi

Mobiuz mobil operatori O‘zbekistonning 7 ta yangiliklar saytiga kirishda Internet-trafik sarflanmasligini ta’minladi. Shuningdek, kompaniya bir qator axborot-ta’lim resurslariga ham bepul kirish imkonini yaratdi.

16-martdan boshlab O‘zbekistonda koronavirus pandemiyasini oldini olish va unga qarshi kurashish bo‘yicha bir qator chora-tadbirlar amalga oshirildi. Ommaviy tadbirlar bekor qilindi, bog‘chalar, maktablar va oliygohlarda o‘qishlar to‘xtatildi, koronavirusga chalingan yoki gumon qilinayotgan insonlar karantin va nazoratga olindi. Jamiyatimizda ushbu mavzu bo‘yicha yangiliklar doimiy kuzatilayotgan va faol muhokama qilinayotgan bir paytda tezkor, aniq va haqiqatga mos ma’lumotlarni olish ahamiyatlidir.

Mobiuz mobil operatori mazkur yilning 1-may sanasigacha abonentlar uchun O‘zbekistonning yettita yangiliklar saytiga kirishni bepul qildi. Ular – Daryo.uz, Kun.uz, Uznews.uz, Gazeta.uz, Podrobno.uz, Uzreport.news va Xabar.uz veb-saytlaridir.

«Bu orqali Mobiuz abonentlari koronavirus bo‘yicha yangiliklardan va joylashtirilayotgan tahliliy ma’lumotlardan yanada kengroq xabar topadi, degan umiddamiz. Mamlakatimiz ommaviy axborot vositalari koronavirus mavzusini keng yoritmoqda, axborot-tahliliy materiallar berib borishmoqda. Endi abonentlarimiz megabaytlari haqida qayg‘urmasdan bu materiallar bilan tanishib chiqishlari mumkin», - deya izohlaydi Mobiuz Bosh direktorining marketing va sotuvlar bo‘yicha o‘rinbosari Lola Filatova.

Avvalroq Mobiuz O‘zbekiston Respublikasi Sog‘liqni saqlash vazirligi call-markazining yagona 1003 raqamiga bepul qo‘ng‘iroqlarni amalga oshirish imkoniyatini yaratgan edi. Aholi ushbu raqam orqali koronavirus bilan bog‘liq barcha savollarga mutaxassislardan javoblar olishi mumkin.

Lekin bu ham hali hammasi emas. Kompaniya o‘sib kelayotgan avlod, ularning ota-onalari va pedagoglar manfaatlari haqida ham doimiy tarzda o‘ylamoqda. O‘tgan yildan boshlab O‘zbekiston Respublikasi Xalq ta’limi vazirligi bilan hamkorlikda abonentlar uchun bir qator axborot-ta’lim saytlariga kirishni bepul qilingan edi. Ular qatorida Eduportal.uz XTV axborot-ta’lim portali, Kitob.uz Respublika bolalar kitobxonasi veb-sayti va boshqa veb-resurslardir (uzedu.uz, xtv.uz, pm.xtv.uz, xt.uzedu.uz, stat.uzedu.uz, emis.uzedu.uz, kundalik.com). Mobiuz hamkori – Khan Academy O‘zbek onlayn ta’lim platformasining (uz.khanacademy.org) imkoniyatlaridan foydalanish ham megabaytlarni sarflamaydi.

Koronavirus pandemiyasini oldini olish chora-tadbirlari doirasida vaqtincha qo‘shimcha qulayliklar yaratildi. Mobiuz abonentlari endi mobil Internet trafigini sarflamagan holda edumarket.uz, online-maktab.uz, talim.uzedu.uz, utube.uz va itschool.uz ta’lim portallarining imkoniyatlaridan foydalanishlari mumkin. Bu esa yoshlar, ota-otanalar hamda o‘qituvchi-murabbiylar uchun shu kunlarda juda dolzarb.

Aytib o‘tish kerakki, veb-resurslarga, shu jumladan OAV saytlariga kirishda proksi-server, shu jumladan VPN dan foydalanilgan bo‘lsa, mobil Internet trafigi narxlanishni boshlaydi.

Mobiuz faoliyatiga doir ko‘proq yangiliklar o‘zbek tilidagi @MOBIUZuzb (https:t.me/MOBIUZuzb) va rus tilidagi @MOBIUZrus (https:t.me/MOBIUZrus) Telegram-kanallarida joylashtirilgan.


Ro'yxatga qaytish